ভাওয়াইয়া-দোতরা পত্রিকা সংখ্যা পঞ্চম প্রকাশিত- ০১/০৩/২০২০

 ভাওয়াইয়া-দোতরা পত্রিকা সংখ্যা পঞ্চম
প্রকাশিত-
০১/০৩/২০২০

মনের কাথা 
       সুধাংশু বর্মন

পহেলা দিনে দেখিয়া বারে
 মনত খাইছে তোক
ক্যাংকরি কোম মনের কাথা
খুলিয়া বাড়ে তোক।
ভেল্লা দিন যাবার পরে...
উলসি উঠিল মন,
সরম -নইজ্জা ফেলেয়া বারে
নদীত দিলুং ঝাপ...
পহরিবার নাপায়া বারে
করং বাপরে বাপ!
কস্ট করি উজান যাছং
ধরিবারে তোক,
জলের সোসত ভাসিয়া যাছং
ক্যাংকরি ধরিম তোক।
দুই-পাও না-হয় গেলুং ভাটি
ডিক্কি ধরিম মাটি,
হুরহুরিয়া যাম উজিয়া
গন্তব্য খানত খাটি।
মনের কাথা মনোত থুইয়া
ধরসুং এই বার কমর ডিকিয়া.
লক্ষ্মী মাক আনির নাইগবে
এই বার ঘরকরিয়া।


ভাওয়াইয়া-দোতরা পত্রিকা সংখ্যা পঞ্চম
প্রকাশিত-
০১/০৩/২০২০

বন্ধু নিয়া শখের গীত গাও
          মঙ্গল বর্মন

ও মোর মাহুত বন্ধু রে যাইও হামার বাড়ি
কুনদিন হয় নাই তোমার সাথে আড়ি।
অবধের মিলনের বন্ধু প্রানেশ লয়ে
স্তোতে বাঁধা জল সাড়া নদী বয়ে।
একাকি ভাসে না নদী -দোলার পানার ফুল
তোর বান্ধুয়ার গাও মজিতে খসিল সোনার ফুল
তোর বান্ধুয়ার গাও মজিতে খসিল সোনার দুল।
তোর্সা টা পার হয়া কুচবিহার খান পায়া
গরুর গাড়িৎ নিয়া যাইম সখিক যায়া।
আর আছে কত কি দেখিবার টানে
সারা খান দেখিয়া জুরাইম হাউস না মেটে প্রাণে।
ভোমরা ফুলের গন্ধে তোমরা আজোও প্রেয়সী
সারা গাও ছড়াইল মোর তোমার ভালোবাসা।


ভাওয়াইয়া-দোতরা পত্রিকা সংখ্যা পঞ্চম প্রকাশিত-
০১/০৩/২০২০

 পুরাণ কাথা
          বিষ্ণু রায় 

হারেয়া গেইসে পয়াল খেড়ের ঘর,
                    নাই আর বাঁশের বিশোকর্মা।
হারাইসে দড়ি পাকা উঠকন,ঢেড়া,
                     নাই ঘরের দুয়ারের ডেওনা।
হারেয়া গেইসে হাচকিনি, বেধা,
                                আরও হারাইসে মই।
হারেয়া গেইসে গরুর বাথান,
                       হারাইসে গামছা বান্ধা দই।
হারেয়া গেইসে হাতুড়া, কুর্শি,
                     নাই ঝাবুরা উঠকা কারালি।
হারাইসে বাঁশের হাদালার চাঙড়া,
                  ঘরোত নাই আর চটি দাগিলি।
হারাইসে পয়াল খেড়ের সেজারি,
                       হারেয়া গেইসে ডার পাখা।
হারেয়া গেইসে ছাম,গাইন,
                           নাই চুরা ভুকিবার ঘাটা।
হারাইসে খরচ করিবার জাওলা,
                           হাটুয়া হারাইসে বাঙ্কুয়া।
হারেয়া গেইসে দেমনিয়ার প্রজা,
                 হারাইসে পুরান বোকাতি চুয়া।
হারেয়া গেইসে ডারিঘরটা,
                          নাই আর শিলিম হোকা।
হারেয়া গেইসে সরু ধানের চাউল,
           গসা হইসে ঠাকুরি কালাইর ছেকা।

ভাওয়াইয়া-দোতরা পত্রিকা সংখ্যা পঞ্চম প্রকাশিত-
০১/০৩/২০২০

      কইম
 রমেন বর্মন

খমকায় করি কইম...
ইকান ঘাটা কায় কায় আসিম একনা আতি নইম
আন্দার আতিত বালোবিলাই বোলে কইতোর নিগাইল পালে
মরিনাগি মোর খ্যায়াল নাই এলানা হইল ভালে
মনের কতা মোর মনোত পচিল কলুং হগহুজার
হাউসের পংকি মোর উড়ি গেইল দেখিয়া খাঁচার...